Helau!
Jetz isses widder soweit: am Höhepunkt vunn de Faschingszeit machen sich ned nur die Vire,
sondern hoffentlich ach die gude Laune breit.
Vun uns Prodeschdande hääst es jo immer: Ernschder geht nimmer.
Tatsächlich werd vun die evangelisch Kerch behaupt, sie wär in manchem doch aarich verstaubt.
Nää, zum Lache gehen mir werklich ned in de Keller,
im Geschedääl, wammer ä fröhlich Gesicht mache, werd´s um uns hoffentlich heller.
Weil mer grundsätzlich Optimischde sinn.
Unn ich wääß, wer ich als kläänes Menschlein bin:
Vum Herrgott geliebt, geherzt unn gedriggt.
Mit Glaube, Liebe unn Hoffnung gespickt.
Unser Herrgott hot uns ach de Humor geschenkt.
Dass mer kummen gut grad durch die Zeide, wo manches bei uns an Seel unn Körper is ausgerenkt.
Irchendwo hab ich mo so richdich geheert: Humor unn Heiterkeit sinn Gottesgawe.
Wie mer uns kenne ach an Sunneschei unn Vogelgesang lawe.
Schunn de Maddin Ludder war kää Kind vun Traurigkeit. Bei ihm hän sich oft genuch Fröhlichkeit unn derbe Sprich gemacht breit.
Unn der hot emol gesaacht so fein: "Wenn Gott keinen Spaß versteht, möchte ich nicht im Himmel sein".
In diesem Sinn lad ich Euch herzlich ei, mit uns fröhlich Fasching zu feire.
Unn des is vor de Passions- unn Faschdezeit ned änerlei.
Kummen Jung unn Alt ganz fleißig, zum Faschingsgottesdinscht am Sunndach 23. Februar in de Kreissparkass Jeddebach um 10.30 Uhr:
11. humorvoll-kabarattistischer Faschingsgottesdienst "Kerche-Gebabbel" mit Presbyter und Büttenredner Ralf Emrich.
Aaschließend gäbt´s wie immer, gratis Berliner ned nur fer die Kinner!
Helau!!!
Eier närrischer Parre
Norman Roth